അതൊരു വാഴയുടെ ചിത്രമായിരുന്നു . വാട്ടര് കളറുകള് കൊണ്ട് വെള്ള പേപ്പറില് വരച്ച ഒരു ചിത്രം .ഏതോ ഒരു കുട്ടി വീട്ടില് നിന്നും വരച്ചു കൊണ്ടുവന്നതായിരുന്നു അത് . മൂന്നാം ക്ലാസ്സിലെ ചുമരില് ജനാലക്കു മേലേ ടീച്ചര് അതൊട്ടിച്ച് വച്ചിരുന്നു . ഒരുനാള് അത് കാണാതെയായി .
ചില കുട്ടികള് പറഞ്ഞു , അത് തങ്കപ്പന് കട്ടെടുത്തതാനെന്നു . വളെരെ കുറച്ചു മാത്രം സംസാരിച്ചിരുന്ന ഒരു കുട്ടി . സ്കൂളിന്റെ പിന്നിലുള്ള ഹരിജന് കോളനിയിലാണ് തങ്കപ്പന്റെ വീട് . പലപ്പൊഴുംഅവന് ആ ചിത്രത്തെ നോക്കി നില്ക്കുന്നതും , ടീച്ചറുടെ കസാരയില് കയറി അത് തൊടുന്നതും ചില കുട്ടികള് കണ്ടിട്ടുണ്ട് !
ടീച്ചര് തങ്കപ്പനോട് ചോദിച്ചില്ല . പക്ഷെ ദിവസങ്ങള് കഴിയും തോറും ഞങ്ങള് എല്ലാ കുട്ടികളും വിശ്വസിച്ചു അത് അവന് തന്നെ എടുത്തതാണെന്ന് ! ഞങ്ങളില് മിക്കവരും അവനുമായി കൂട്ടുകൂടാന് പോയില്ല . ഒറ്റയ്ക്ക് തല താത്തി നടന്നു പോകുമായിരുന്ന അവനെ പിന്നില് നിന്നും പല കുട്ടികളും വിളിച്ചു " കള്ളന് തങ്കപ്പാ....."
അഞ്ചാം ക്ലാസ്സില് നിന്ന് ജയിച്ചപ്പോള് ഞാന് ആ സ്കൂള് വിട്ടു ഹൈ സ്കൂളിലെക് മാറി. പിന്നീട് കുറെ കൊല്ലങ്ങള്ക്കു ശേഷം ടൌണില് ബസ്സ് കാത്തു നില്ക്കുന്ന തന്കപ്പനെ കണ്ടു , സംസാരിച്ചില്ല . വേഷവും കയ്യിലെ പണി ആയുധങ്ങളും കണ്ടപ്പോള് തോന്നി , കല്ല് വെട്ടായിരിക്കണം ജോലി ! എട്ടാം വയസ്സില് തന്നെ കള്ളനാക്കപെട്ട ഒരു ഹരിജന് കുട്ടി പിന്നെ ജീവിതത്തില് എന്താകാന് ?!!!
വീണ്ടും കുറച്ചു കൊല്ലങ്ങള്ക്കു ശേഷം , നാട്ടിലുള്ളപ്പോള് , ഒരു ഇലക്ഷന് കാലത്ത് ഞാന് ആ കോളനിയിലേക്ക് പോയി . ഒരു ചെറിയ കുടിലില് വെച്ച് ഒരു സഗാവ് ചോദിച്ചു " നിനക്കറിയില്ലേ , തന്കപ്പനെ , നമ്മുടെ ക്ലാസ് മേറ്റ് ?" .തങ്കപ്പന് അവിടെ ഉണ്ടായിരുന്നില്ല . തങ്കപ്പന്റെ അമ്മ രണ്ടു ആണ്കുട്ടികളെ അഭിമാനത്തോടെ മുമ്പിലേക്ക് ആക്കികൊണ്ട് പറഞ്ഞു " തങ്കപ്പന്റെ കുട്ടികളാണ് !!" ഞാന് മൂത്ത കുട്ടിയോട് ചോദിച്ചു . ഇതു ക്ലാസ്സിലാണ് പഠിക്കുന്നത് എന്ന് . അവന് പറഞ്ഞു " മൂന്നാം ക്ലാസ്സില് ". എനിക്ക് സങ്കടം വന്നു , വെറുതെ !
Nannayittundu
മറുപടിഇല്ലാതാക്കൂ