ബൂമറാങ്ങ്

എന്റെ അനുഭവത്തിൽ നിന്നും പറയുന്നത് ആണ് ! ബോസ്സ് മാരോട് സംസാരിക്കുമ്പോൾ ശ്രദ്ധിക്കണം . പ്രത്യേഗിച്ച് വിടുവായത്തം പറയുമ്പോൾ ! :)

ഒരിക്കൽ ഞാൻ  ബോസ്സിനോട് സംസാരിക്കുക ആയിരുന്നു . അബു ദാബിയിലെ ഞങ്ങളുടെ ഓഫീസിൽ ബയിസ്മെന്റിൽ ഒരു കോഫീ ബാർ ഉണ്ടായിരുന്നു . അവിടുത്തെ വലിയ സ്ടൂളുകളിൽ കയറിയിരുന്നു കാപ്പി കുടിച്ചു കൊണ്ടാണ് 'വർത്താനം' !

ബോസ്സ് അദ്ധേഹത്തിന്റെ പഴയ ജോലികളിലെ പരാക്രമങ്ങൾ പറഞ്ഞു കൊണ്ടിരുന്നപ്പോൾ  ഒരു സന്ദർഭത്തിൽ ഞാൻ പറഞ്ഞു " ബോസ്സ് , നാളെ എന്നെ ചൈനയിലെ ഏതെങ്കിലും വിദൂര ഗ്രാമത്തിലേക്ക് സ്ഥലം മാറ്റിയാലും അടുത്ത ദിവസം സാധാരണത്തെ പോലെ ജോലി തുടങ്ങാൻ എനിക്ക് ബുദ്ധി മുട്ട് ഉണ്ടാവില്ല കാരണം ഈ വർഷങ്ങളിൽ ഒക്കെ തന്നെ ഞാൻ വിവിധ ദേശങ്ങളിൽ , സംസ്കാരങ്ങളിൽ , ഭാഷകൾ സംസാരിക്കുന്ന ആളുകൾക്ക് ഇടയില ആണ് ജോലി ചെയ്തിട്ടുള്ളത് , കൂടുതലും 'ഓണ്‍ ദി സ്ട്രീറ്റ് ' എക്സ്പീരിയൻസ് ആണ് "  ( ഇംഗ്ലീഷ് ഇൽ ആണ് കാച്ചിയത് ;) ) ! ബോസ്സ് തലയാട്ടികൊണ്ട് കേട്ടിരുന്നു !

മാസങ്ങൾ കഴിഞ്ഞു ! ഒരു ദിവസം ഞാൻ ഒരു മീറ്റിംഗിൽ ആയിരുന്നു . ബോസ്സിന്റെ കാൾ വന്നു ! "Where  are you " ? ..സയിൽസിൽ ജോലി ചെയ്യുന്നവർ വെറുക്കുന്ന ഒരു ചോദ്യം ആണ് അത് ! ഞാൻ പറഞു "ഒരു മീറ്റിംഗിൽ ആണ് "  ബോസ്സ് പറഞ്ഞു " ok come to office " ...ഞാൻ ഒന്ന് കൂടി പറഞ്ഞു നോക്കി " ബോസ്സ് , ഞാൻ ഒരു മീറ്റിങ്ങിനു ഇടയിൽ ആണ് " !

" ഓക്കേ , മനസ്സിലായി ! മീറ്റിംഗ് പെട്ടെന്ന് തീർത്തു ഓഫീസിലേക്ക് വരിക , ആൻഡ്‌ മീറ്റ്‌ മി " !

എന്റെ "ഹ്യുണ്ടായ് ആക്സന്റ് " കാർ ഓടിച്ചു തിരിച്ചു പോരുമ്പോൾ ഒരു പന്തിയില്ലായ്മ ! ഞാൻ കാറിൽ ഇരുന്നു പതിവ് പോലെ സംസാരിച്ചു തുടങ്ങി " എന്തായിരിക്കും ? പണി പോയോ ? "  എല്ലാ അശുഭ ചിന്തകളും ഒന്നിച്ചു വരാൻ തുടങ്ങി !

ടാർഗറ്റ് ഒക്കെ അച്ചീവ് ചെയ്തിട്ടുണ്ട് ! ആരുമായും സീരിയസ് ആയ പ്രശ്നങ്ങൾ ഒന്നും നിലവിൽ ഇല്ല ! പുതിയ ഏതെങ്കിലും കസ്റ്റമർ മാർ കമ്പ്ലൈന്റ് കാച്ചിയിരിക്കുമോ ? ഒരു പൈലറ്റ്‌ ചീത്ത പറഞ്ഞു ആണ് രണ്ടൂസം മുമ്പ് ഇറങ്ങി പോയത് !  അല്ലെങ്കിലും പണി പോകാൻ അത്ര വലിയ കാരണങ്ങൾ ഒന്നും വേണ്ട !   തക്കാളി ഇട്ട ഷവർമ മാറി കിട്ടിയതിനു അത് കൊണ്ട് ഒരു ഏറും കൊടുത്തു പണിയിൽ നിന്നും സെക്രട്ടറിയെ പിരിച്ചു വിട്ട ആൾ ആണ് ചെയർമാൻ ! ഒരു ഷവർമ പോലും കൃത്യം "specification " ഇൽ ഓർഡർ ചെയ്തു വരുത്താൻ കഴിയാത്തവർ എങ്ങനെ ഒരു കമ്പനിയുടെ കാര്യങ്ങൾ നോക്കും ? ഇതാണ്  ആ "logic " ! അപ്പോൾ പിന്നെ നമ്മുടെ പണിക്കു വലിയ guarantee  ഒന്നും ഇല്ല ! അങ്ങനെ പോയി ചിന്തകള് !

ഓഫീസിൽ എത്തി നേരെ ബോസ്സിന്റെ കാബിനിൽ ചെന്നു. ബോസ്സ് ഒരു കടലാസ് എടുത്തു തന്നു . എന്നിട്ട് പറഞ്ഞു , "നാളെ ഒമ്പത് മണി . റിപ്പോർട്ട്‌ അറ്റ്‌ ദുബൈ ഓഫീസ് " !!

ചെറിയ ഒരു പ്രമോഷൻ , സ്ഥലം മാറ്റവും . ദുബായിയിൽ തുടങ്ങിയ പുതിയ ബ്രാഞ്ചിലേക്ക്  !!

ഞാൻ ഇരുന്നു വിക്കി ! അബുധാബിയിൽ "എസ്ടബ്ലിഷ് " ചെയ്തിരുന്നത് കൊണ്ട് എനിക്ക് പോകാൻ താല്പര്യം കുറവ് ! ഞാൻ പറഞ്ഞു ! " ബോസ്സ് , നിങ്ങള്ക്ക് അറിയാം , ഫാമിലി ഇവിടെ ഉണ്ട് ! ഫ്ലാറ്റ് ഉണ്ട് ..അതുണ്ട് ഇതുണ്ട് .. "

അപ്പോളാണ് ബോസ്സ് ആ ബോംബു പൊട്ടിച്ചത് !

" നീയല്ലേ പറഞ്ഞത് ചൈനയിലേക്ക് സ്ഥലം മാറ്റിയാലും അടുത്ത ദിവസം ജോലി തുടങ്ങാൻ പ്രയാസം ഉണ്ടാവില്ല എന്ന് ?? ഇന്ന് ഇനി ഓഫീസിൽ ഇരിക്കണ്ട വീട്ടിലേക്കു പൊയ്ക്കോളൂ , രണ്ടാഴ്ച ദുബായിയിൽ പോയി വരാൻ ഉള്ള ടി എ ഞാൻ approve ചെയ്യാം അതിനുള്ളിൽ ഒരു സ്ഥലം കണ്ടു പിടിച്ചോളൂ " !

ഞാൻ പിന്നെ ഒന്നും പറയാൻ നിന്നില്ല !  :)

ഗൾഫിൽ നാടോടി കഥകൾ ഉണ്ടാകുന്നത് ....

ഗൾഫിൽ ജീവിക്കുന്നവർ പല പ്രശ്നങ്ങളിലും പോയി പെടാർ ഉണ്ട്. അങ്ങനെ ഉള്ള ധാരാളം പേരെ ഇവിടെ ജീവിക്കുന്നവർക്കൊക്കെ അറിയുമായിരിക്കും ! പല ചെറിയ കാര്യങ്ങൾ പോലും കാട്ടുതീ പോലെ പരക്കും പലരും അത് ഒരു പാട് കാലം ഓർമ വെക്കും യാഥാർത്ഥ്യവുമായി അതിന് ബന്ധമൊന്നും ഉണ്ടാവണം എന്നും ഇല്ല!  :D

മഴ വളരെ അപൂർവ്വമായേ ഗൾഫിൽ പെയ്യാറുള്ളൂ . ഒരിക്കൽ അജ്മാനിൽ ഭീകര കാറ്റും മഴയും. രാത്രിയാണ്. ഞാൻ ഉറങ്ങുകയായിരുന്നു. വെള്ളം വീഴുന്ന ശബ്ദം കേട്ട് എഴുന്നേറ്റ് നോക്കി. ഒന്നും കണ്ടില്ല. വീണ്ടും കിടന്ന് ഉറങ്ങി. രാവിലെ എഴുന്നേറ്റ് നോക്കുമ്പോൾ റൂം നിറയെ വെള്ളം . പെട്ടെന്ന് ആണ് ഓർത്തത് എന്റ്റെ പാസ്പോർട്ടും സർട്ടിഫിക്കറ്റുകളും ഉള്ള ചെറിയ ഷോൾഡർ ബാഗ് ജനലിനടിയിൽ ആണ് വച്ചിരുന്നത്. ചാടി എഴുനേറ്റ് അത് എടുത്തു. ബാഗ് വെള്ളത്തിൽ കുതിർന്നിരിക്കുന്നു. ജനൽ പാളികൾക്ക് ഇടയിലൂടെയാണ് വെള്ളം ഉള്ളിലേക്ക് വന്നത്! ഭാഗ്യത്തിന് സർട്ടിഫിക്കറ്റുകൾ ഫയലിന് ഉള്ളിൽ ആണ് .നനഞ്ഞിട്ടില്ല ! പക്ഷെ പാസ്പോർട്ടിന്റെ ചില ഭാഗങ്ങൾ നനഞ്ഞിരിക്കുന്നു! ഫോട്ടോയിൽ അടിച്ചിട്ടുള്ള സീൽ നനഞ്ഞ് മഷി പരന്നിരിക്കുന്നു! എന്റെ പകുതി ജീവൻ പോയി ! എനിക്കാണെങ്കിൽ അടുത്ത ആഴ്ച നാട്ടിലേക്ക് പോകുകയും വേണം !

എന്റെ പരിഭ്രമം കണ്ട് ജോലിക്ക് പോകാൻ ഇറങ്ങിയ അടുത്ത മുറിക്കാരൻ കാര്യം  അന്വേഷിച്ചു !

" ഇനി പണിയായി .നിങ്ങൾക്ക് നാട്ടിൽ പോകാൻ പറ്റും എന്ന് തോന്നുന്നില്ല" എന്നും പറഞ്ഞ് മൂപ്പര് പോയി ! :D

ഞാൻ റെഡിയായി ഉടൻ ഇറങ്ങി. എംബസിയിൽ പോയി പുതിയ പാസ്പോർട്ടിന് കൊടുത്തിട്ട് തന്നെ കാര്യം :D .അടുത്ത ഹോട്ടലിൽ കയറി ബ്രേക്ക് ഫാസ്റ്റ് കഴിക്കാൻ. ആ ഹോട്ടൽ ഉടമ നാസർക്ക എന്നെ കണ്ടതും ചാടി എഴുന്നേറ്റ് ചോദിച്ചു !

"നാട്ടിൽ പോക്ക് കുളം ആയി ല്ലേ? ഇനി ഇപ്പോ പുതിയ പാസ്പോർട്ട് കിട്ടി വിസ അടിച്ച് പോവൽ പെട്ടെന്ന് നടക്കില്ല" !

ഓഫീസിലേക്ക് പോയ അയൽവാസി അവിടെ വാർത്ത കത്തിച്ചിരിക്കുന്നു.ഹോട്ടലിൽ ഇരിക്കുന്ന ഓരോരുത്തരും ഓരോ കമൻറുകളും പാമ്പുകടി കഥകൾ പോലെ ഓരോ കഥകളും പറഞ്ഞു കൊണ്ടിരുന്നു. :D ഞാൻ തലയാട്ടി എല്ലാം കേട്ട് ബ്രേക്ക് ഫാസ്റ്റ് കഴിച്ചു.

എംബസിയിൽ ചെന്ന് കാര്യം പറഞ്ഞു. ഒരു ഓഫീസർ പാസ്സ്പോർട്ട് വാങ്ങി സൂക്ഷ്മപരിശോധന നടത്തി വേറൊരാൾക്ക് കൊടുത്തു അയാൾ വേറൊരാൾക്ക് ഞാൻ ഇത് എങ്ങനെ പറ്റി എന്ന് വിശദീകരിച്ച് മടുത്തു! :D പക്ഷെ അവസാനത്തെ മല്ലു ഓഫീസർ കൂടുതൽ പ്രാക്ടിക്കൽ ആയ ഒരാൾ ! മൂപ്പര് പറഞ്ഞു " പുതിയ പാസ്പോർട്ട് സമയം എടുക്കും .പക്ഷെ ഇത് അത്ര പ്രശ്നം ഉണ്ടെന്ന് തോന്നുന്നില്ല .നിങ്ങൾക്ക് ട്രാവൽ ചെയ്യാം . ശ്രമിച്ച് നോക്കൂ. എന്തെങ്കിലും പ്രശനം ഉണ്ടെങ്കിൽ അവിടെ നിന്ന് ഈ നമ്പറിൽ വിളിക്കൂ ഞാൻ സംസാരിച്ചോളാം " :D !

ഭാഗ്യത്തിന് ദുബായ് എയർപോർട്ടിലെഎ മിഗ്രേഷനിലെ ഓഫീസർക്കും എന്റെ വിശദീകരണം ബോധിച്ചു. പക്ഷെ തിരിച്ച് വരുമ്പോൾ പുതിയ പാസ്പോർട്ട് വേണം എന്ന് പറഞ്ഞു. കോഴിക്കോട് എയർപോർട്ടിലെ എമിഗ്രേഷൻ ഓഫീസറും അത് തന്നെ പറഞ്ഞു. തിരിച്ച് പോകുമ്പോൾ പുതിയ പാസ്പോർട്ട് വേണം.

മലപ്പുറം പാസ്പോർട്ട് ഓഫീസറുടെ മുമ്പിലെ ക്യൂവിൽ മുമ്പിൽ നിന്ന ആളുടെ ഭാര്യ പാസ്പോർട്ട് ഷർട്ടിന്റ കൂടെ വാഷിംഗ് മെഷീനിൽ ഇട്ട് തിരുമ്പിയതായിരുന്നു. :D അയാൾക്ക് Rs.2500 ഫൈൻ അടിച്ചു! പക്ഷെ എന്റെ കദന കഥ പാസ്പോർട്ട് ഓഫീസർ അവിശ്വസനീയ മുഖഭാവത്തോടെയാണ് കേട്ടതെങ്കിലും ഫൈൻ ചെയ്തില്ല :D വേഗം പാസ്പോർട്ട് കിട്ടി!

ഈ കഥ കഴിഞ്ഞ് ഒരു അഞ്ച് കൊല്ലമെങ്കിലും കഴിഞ്ഞ് ഞാൻ അജ്മാനിലെ ആ പഴയ ഹോട്ടലിൽ ചായ കുടിക്കാൻ കയറി. ഒരു പരിചയം പുതുക്കുകയും ചെയ്യാലോ ! എന്നെ കണ്ടതും നാസർക്ക  പറഞ്ഞു " ഇങ്ങളെവിടെയാണ് ഭായീ ? ഇങ്ങടെ കാര്യം ഇന്നലെ കൂടി പറഞ്ഞേ ഉള്ളൂ അപ്പറത്തെ ചെക്കന്റെ പാസ്പോർട്ട് കാണാണ്ടായപ്പോൾ " :D

അജ്മാനിൽ ഇപ്പോ ആരുടെ പാസ്പോർട്ട് പോയാലും കേടായാലും ഈ കഥ ഓർമിക്കപ്പെടുന്നു! ആ കഥ ക്ക് പല വകഭേദങ്ങൾ ഉണ്ടാകുന്നതും ! ആ പാസ്സ്പോർട്ട് നനച്ചവനെ പോലീസ് പിടിക്കുന്നതും , അയാൾ ആത്മഹത്യ ചെയ്തതും തുടങ്ങി ക്ലൈമാക്സുകൾ ഉണ്ടാകുന്നതും .ചോറ് കഴിക്കാൻ മടിക്കുന്ന കുട്ടികൾക്ക് അജ്മാനിൽ അമ്മമാർ ആ കഥ പറഞ്ഞ് കൊടുക്കുന്നതും  ഞാൻ സ്വപ്നം കാണാറുണ്ട് :D :D :D

പകൽ സ്വപ്നം

പകൽ സ്വപ്നം കാണുന്ന സ്വഭാവം എവിടുന്ന് കിട്ടിയതാണെന്ന് ഞാൻ തന്നെ ചിലപ്പോൾ ആശ്ചര്യപ്പെടാറുണ്ട് ! ഇന്ന് ഓഫീസിൽ നിന്ന് വരുമ്പോൾ പെട്ടെന്ന് അതിവേഗം കാറോടിച്ച് വന്ന് ഒരു അറബി എന്റെ കാറിന്റെ തൊട്ട് പിന്നിൽ കൊണ്ട് വന്ന് ഫ്ലാഷ് അടിച്ചപ്പോൾ ഒരു ഞെട്ടലോടെ കാറ് ലൈൻ മാറ്റിക്കൊടുത്തു . സ്വതവേ പേടിത്തൊണ്ടനായ ഒരുവൻ പിന്നെ എന്ത് ചെയ്യാൻ! ആ സമയം തൊട്ട് ഞാൻ സ്വപ്നം കാണാൻ തുടങ്ങി  അവന്റെ പിന്നാലെ പറന്ന് ഒരു കാർ സ്റ്റണ്ട് ചെയ്യുന്നു. അവന്റെ കാറിന്റെ തൊട്ട് പിന്നിൽ കൊണ്ട് ചെന്ന് ഫ്ലാഷ് അടിക്കുന്നു പിന്നെ വെട്ടിച്ച് മുമ്പിൽക്കയറി സഡൻ ബ്രേക്ക് ഇടുന്നു. കാർ ചെരിച്ച് രണ്ട് ചക്രങ്ങളിൽ ഓടിച്ച് അവന്റെ കാറിനെ വലം ചുറ്റുന്നു.അതോടെ പോടിച്ചരണ്ട് അറബി പുറത്തിറങ്ങി പറയുന്നു മാലിഷ്... മാലിഷ് ! :D

ഫ്ലാഷ്ബാക്ക് !

ഒരു പത്തു വയസ്സുകാരൻ  മെല്ലിച്ചചെക്കനും ആയി അവന്റെ ഉമ്മ ഒരു പാലക്കാടൻ വിദൂര ഗ്രാമത്തിൽ നിന്നും ബസ്സിൽ കയറി തൃശൂർക്ക് ഡോക്ടർമാരെ കാണാൻ പോകുന്നത് ഒരു  സ്ഥിരം കാഴ്ചയായിരുന്നു! ചെക്കൻ ഒരു അസുഖ കുട്ടിയായിരുന്നു. ഒന്ന് തുമ്മിയാൽ പാലക്കാടോ പറമ്പിക്കുളത്തോ ഡ്യൂട്ടിക്ക് പോയ പോലീസിനെ കാക്കാതെ ഉമ്മ കൊണ്ടോടും!  സ്വപ്നത്തിലെന്ന പോലെ കാറ്റ് തട്ടിയാൽ വിഴും പോലെ ചെക്കൻ ഉമ്മാടെ കൂടെ നടക്കും . തെരുവോരങ്ങളെ നോക്കി ,വാണിഭക്കാരെ നോക്കി ഇടക്ക് ഓരോ കരിമ്പനകൾ മാത്രം തല ഉയർത്തി നിന്നിരുന്ന കുന്നിൻ ചെരുവകളെ നോക്കി  ബി എം എസ് ബസ്സിന്റ തളുത്ത കമ്പികളിൽ കവിൾ മുട്ടിച്ച് പുറത്തേക്ക് നോക്കിയിരിക്കും ! അങ്ങനെ നോക്കി ഇരുന്ന് സ്വപ്നം കാണും . വിജനമായ ആ കുന്നിൻ ചരുവയിലൂടെ കുതിരകളിൽ കൊള്ളക്കാർ പാഞ്ഞ് വരും .ചമ്പൽ കൊള്ളക്കാരേപ്പോലെ .ശരീരത്തിൽ തിരകളുടെ ബെൽറ്റ് തൂക്കിയ കൊമ്പൻ മീശക്കാർ ബിം എം എസിനെ ആക്രമിക്കും .യാത്രക്കാർ ഒക്കെ കരയാൻ തുടങ്ങും .ഈ സമയം ആ ചെക്കൻ ബസിന്റെ കമ്പികളിൽ  തൂങ്ങി ആടി ആകൊള്ളക്കാരോട് പൊരുതും അവസാനം കൊള്ളക്കാർ പിൻതിരിഞ്ഞ് തോറ്റോടും ! എല്ലാവരും ആ ചെക്ക നോട് നന്ദി പറയും .

അപ്പോൾ ആ ചെക്കന്റെ ഉമ്മ വിളിക്കും " സ്വപ്നം കാണാണ്ട് ഇറങ് .നമ്മുടെ സ്റ്റോപ്പായി " ! :D

കാലം ഒരുപാട് കഴിഞ്ഞ്പോയിരിക്കുന്നു. പക്ഷെ യു എ ഇ ലെ ഹൈവേയിലൂടെ കാറോടിക്കുമ്പോൾ ആ ചെക്കൻ ഇപ്പോഴും സ്വപ്നങ്ങൾ കാണുന്നു !  :D

ഒരു നുള്ള് ഉപ്പ് !

ആർമേനിയ എത്തിയതിന്റെ അടുത്ത ദിവസം രാവിലെ ചില ശബ്ദം കേട്ട് ഞാൻ ഉണർന്നപ്പോൾഎന്റെ സുഹൃത്ത്ക്കൾ രണ്ടു പേരും നേരത്തെ എഴുന്നേറ്റ് പ്രഭാത സവാരിക്ക് പോകാൻ തയ്യാറാവുകയായിരുന്നു .ഞാൻ വരുന്നില്ല എന്ന് പറഞ്ഞു. എന്നെ മടിയൻ ,കിടന്ന് പോത്ത് പോലെ കൂർക്കം വലിച്ച് ഉറങ്ങിക്കോളും എന്നൊക്കെ അധിക്ഷേപിച്ച് അവർ വിജനമായ തെരുവിലേക്ക് ഇറങ്ങി നടന്നു പോയി. 

എന്റെ ഉറക്കം കളഞ്ഞവൻമാരെ പ്രാകി ഞാൻ ജനാലകൾ തുറന്നിട്ടു ! തെരുവിന്റെ അറ്റത്തൂടെ രണ്ട് പേർ മത്സരിച്ച് നടന്ന് പോകുന്നത് കാണാം :) ! ഞായറാഴ്ച ആയതു കൊണ്ടാവണം തെരുവ് നിർജ്ജീവമാണ്! കുറച്ച് നേരം പുറത്തേക്ക് നോക്കിയിരുന്നപ്പോൾ എനിക്ക് മടുത്തു. ഞാൻ ടോയിലറ്റിൽ ഒക്കെ  പോയി വന്നപ്പോൾ ഒരു ഐഡിയ !ബ്രേക്ക് ഫാസ്റ്റ് ഉണ്ടാക്കിയാലോ ? ഞങ്ങൾ ഒരു ഹോസ്റ്റലിൽ ആണ് താമസിച്ചിരുന്നത് .ഞങ്ങളുടെ മുറിക്കടുത്ത് തന്നെ ഒരു ചെറിയ " കഫ്റ്റീരിയ " ഉണ്ട്. സ്വന്തമായി ഉണ്ടാക്കി കഴിക്കാം. തലേ ദിവസം രാത്രി ഞങ്ങൾ മുട്ടയും ബ്രെഡും പഴങ്ങളും ഒക്കെ വാങ്ങിയിരുന്നു.നേരത്തെ ആയത് കൊണ്ട് ആരും എഴുന്നേറ്റിട്ടും ഇല്ല.

പക്ഷെ ഞാൻ നോക്കുമ്പോൾ സ്റ്റൗ ഓ കെറ്റി ലോ ഒന്നും കാണാനില്ല. ഞാൻ അവ തപ്പുന്ന ശബ്ദം കേട്ട് ഹോസ്റ്റൽ ഉടമ  എഴുന്നേറ്റ് വന്നു .രണ്ടും എടുത്ത് തന്നു.ഞാൻ മുട്ടകൾ കുറച്ച് വെള്ളത്തിൽ ഇട്ട് തിളക്കാൻ വച്ചു.

ഈ സമയം മധ്യവയസ്കയായ, സ്വിസ് അർലന്റ് കാരിയായ ഹോസ്റ്റലിന്റെ ഉടമ ഒരു ടേബിളിനടുത്ത് ഇരുന്ന് എന്നോട് ഇന്ത്യയെ കുറിച്ച് സംസാരിക്കാൻ തുടങ്ങി. ഹോളിയേ കുറിച്ചും, ഇന്ത്യക്കാർ തെരുവിൽ നൃത്തം ചെയ്യുമോ ,ഷാരൂഖ് ഖാനെ ഇഷ്ടം ആണ്. ഹിന്ദി സീരിയലുകൾ ധാരാളം കാണാറുണ്ട്! എന്തുകൊണ്ടാണ് ഇന്ത്യക്കാർ സാരി ഉടുത്ത് ഉറങ്ങാൻ പോകുന്നത് ? ഇതൊക്കെ ആയിരുന്നു സംശയങ്ങൾ ! എന്റെ വിക്ഞാന പരിതിയിൽ ഉള്ള കാര്യങ്ങൾ ആയത് കൊണ്ട്. എല്ലാറ്റിനും മറുപടി കൊടുത്തു. ;) സാരി ഉടുത്ത് ഉറങ്ങുന്ന കാര്യം സത്യം പറഞ്ഞാൽ ഞാനും അപ്പോളാണ് ചിന്തിച്ചത്! ഈ സീരിയലുകൾ ഉണ്ടാക്കുന്ന ഓരോ പ്രശനങ്ങൾ നോക്കൂ!

ഈ സമയത്ത് വെള്ളം തിളച്ചു. ഞാൻ അവരോട് കുറച്ച് ഉപ്പ് വേണം എന്ന് പറഞ്ഞു. ഞാൻ മുട്ട വേവിക്കുന്ന വെള്ളത്തിലേക്ക് ഉപ്പ് ചേർക്കുന്നത് കണ്ട് അവർ ചോദിച്ചു.

ഇതെ ന്തിനാണ്?

ഞാൻ പറഞ്ഞു

തോട് ഈസി ആയി പൊളിക്കാം!

അവർക്ക് അത്ഭുതം ആയി.

അതിന് തണുത്ത വെള്ളത്തിൽ ഇട്ടാൽ പോരെ?

ഞാൻ പറഞ്ഞു

ഉപ്പിട്ടാൽ കുറച്ച് കൂടി ഈ സി ആയിരിക്കും.

അവർ ഒരു മുട്ട തോൽകളഞ് നോക്കി ,ആശ്ചര്യപ്പെട്ടു! :)

ഈ സമയം ഒരു സ്പെയിൻ കാരി എഴുന്നേറ്റ് വന്ന് ഞങ്ങളുടെ സംസാരത്തിൽ ചേർന്നു.അവർ ഇന്ത്യയിൽ വന്നിട്ടുണ്ട് .ഇന്ത്യയിൽ എല്ലായിടത്തും പോയിട്ടുണ്ട് .

കുറച്ച് കഴിഞ്ഞപ്പോൾ ക്ലീൻ ചെയ്യാനുണ്ട് .പിന്നീട് കാണാം എന്ന് പറഞ്ഞ് ഹോസ്റ്റൽ ഓണർ എഴുന്നേറ്റ് പോയി. സ്പെയിൻ കാരി ഇന്ത്യയെ കുറിച്ച് വാചാലയായി. രാജസ്ഥാനെ കുറിച്ചും മണിപ്പുരിനെ കുറിച്ചും ഒക്കെ.കുറച്ച് സമയം  കഴിഞ്ഞപ്പോൾ അവരുടെ ബോയ് ഫ്രണ്ട് പിന്നിലൂടെ വന്ന് കെട്ടിപ്പിടിച്ച് ഒരുമ്മ കൊടുത്ത് എന്നോട് ഹായ് പറഞ്ഞ് പോയി.തലേന്ന് ഞങ്ങൾ പരിചയപ്പെട്ടിരുന്നു. എന്തായാലും ഉമ്മ കൊടുത്തത് എനിക്ക് ഇഷ്ടപ്പെട്ടില്ല !

ഞങ്ങളുടെ ചർച്ച മുറുകിയപ്പോൾ മൂന്ന് ചൈനക്കാരു (രണ്ട് പെൺകുട്ടികളും ഒരു ആണും) ചേർന്നു. സംസാര മദ്ധ്യേ ചൈനക്കാരന്‍ ചിരിച്ചു കൊണ്ട്  പറഞ്ഞു .

 " ഇന്ത്യയും ചൈനയും തമ്മില്‍ ചില പ്രശ്നങ്ങള്‍ നടക്കുന്നുണ്ട് . ചൈനയിലെ മീഡിയ പറയുന്നത് ഇന്ത്യയുടെ അഗ്ഗ്രെഷന്‍ ആണെന്നാണ്‌ "

ഞാന്‍ പറഞ്ഞു "  ഇന്ത്യന്‍ മീഡിയ പറയുന്നത് ചൈനയുടെ അഗ്ഗ്രെഷന്‍ ആണെന്നാണ്‌ "

അയാള്‍ ചിരിച്ചു കൊണ്ട് കൈ നീട്ടി ഷേക്ക്‌ ഹാന്‍ഡ്‌ തന്നു !

അപ്പോളേക്കും എന്റെ സുഹൃത്തുക്കള്‍ തിരിച്ചെത്തി.ഞങ്ങൾ ഒന്നിച്ച് ബ്രേക്ക് ഫാസ്റ്റ് കഴിച്ചു.

നല്ല അനുഭവങ്ങളായിരുന്നു അവരോടൊക്കെ സംസാരിച്ചത് .പക്ഷെ എന്റെ വിഷമം അതല്ല. ഇനി ഒരു അമ്പതോ നൂറ് കൊല്ലമോ കഴിയുമ്പോൾ എല്ലാ ആർമേനിയൻ വീടുകളിലും മുട്ട പുഴുങ്ങുമ്പോൾ ഉപ്പിടൽ വിദ്യ സാധാരണമാകും.ഇന്ത്യയിലെ കേരളത്തിൽ നിന്ന് AD 2017ൽ ആർമേനിയ സന്ദർശിച്ച ഒരു ബാക്ക് പാക്കർ ആണ് ഈ വിദ്യ ആർമേനിയയിലേക്ക് കൊണ്ട് വന്നത് എന്ന് അന്ന് ആരെങ്കിലും ഓർക്കുമോ ? ഒരു തെളിവായി ഈ  ബ്ലോഗില്‍ എങ്കിലും  കിടക്കട്ടെ ;)

നിഷ്കളങ്കൻ !

ഒരികൽ തൃത്താലയിൽ നിന്നും പട്ടാമ്പി ക്കുള്ള ബസ്സിൽ കയറിയപ്പോൾ ഉണ്ട് രാജേന്ദ്രൻ ആ ബസ്സിൽ . ഞാൻ അവന്റെ ക്ലാസ്സ്‌ മേറ്റ്‌ ആണ് ! :) . വളരെ സന്തോഷം തോന്നി . കുറെ ...കാലം കഴിഞ്ഞു കാണുക ആണ് .വളരെ തിരിക്കുണ്ട് ബസ്സിൽ . അവൻ ചോദിച്ചു .

"ഡാ ...നീയൊക്കെ ഇത് എവിടെ ആണ് ? ഗൾഫ്‌ ഇൽ പോയി എന്ന് കേട്ടു പിന്നെ ഒരു വിവര വും ഇല്ലല്ലോ എപ്പോ വന്നു " ?

ഉച്ചത്തിൽ ആണ് ചോദ്യം . ബസ്സിൽ ഉള്ള എല്ലാവര്ക്കും കേള്ക്കാം " .

ഞാൻ പറഞ്ഞു . "വന്നിട്ട് ഒരു ആഴ്ച ആയി ! "

"അവിടെ എങ്ങനെ ഉണ്ട് ? ഇപ്പൊ ഗള്ഫിലും കാര്യം ഒന്നും ഇല്ല ല്ലേ ? എന്റെ ഒരു നാട്ടുകാരൻ പോയിട്ടു കുറെ കാലം ആയി .ഒരു കാര്യവും ഇല്ലാത്രെ അവിടെ ആടിനെ നോക്കലാണ് ത്രെ "

പൈസ വാങ്ങാൻ വന്ന കണ്ടക്ടർ എന്നെ നോക്കി ഒന്ന് ചിരിച്ചു !!

ഞാൻ പറഞ്ഞു "ആ അങ്ങനെ യും കുറെ പേരുണ്ട് " !

"അല്ല ഡാ നീ നമ്മടെ കൂടെ പഠിച്ചോരെ ഒക്കെ കാണാറുണ്ടോ ? നാൻസിയെ ഇന്നാളു ഞാൻ ത്രിശൂർ ന്നു കണ്ടു .രണ്ടു കുട്ട്യേളും ഉണ്ട് !! പഠിക്കുംപോലത്തെ ഗ്ലാമർ ഒന്നും ഇല്ല . "

ഇത്തവണ മുന്നിലെ സീറ്റിൽ ഇരുന്നിരുന്ന ചേച്ചി ബുദ്ധിമുട്ടി തല തിരിച്ചു ഞങ്ങളെ നോക്കി ഒന്ന് പുഞ്ചിരിച്ചു .

സുബ്ജെക്ട് മറ്റാൻ വേണ്ടി ഞാൻ പറഞ്ഞു . "നീ ക്രാഷരിൽ തന്നെ ആണോ ജോലി ചെയ്യുന്നത് !! "?

"ഏയ്‌ !അത് വിട്ടു ! .പി എസ് സി കിട്ടി . പഞ്ചായത്തിൽ ആണ് .ഇപ്പൊ രണ്ടു കൊല്ലം ആയി . ആദ്യം നമ്മ്ടെ വിനോദിന്റെ നാട്ടിൽ .അവന്റെ വീടിനടുത്ത് .അവൻ മാഷ്‌ അല്ലെ ? അവൻ ആ ശ്രുതിയെ കെട്ടിയില്ല . വീട്ടുകാര് സമ്മതിച്ചില്ല . അച്ഛന് ആയിരുന്നു പ്രശ്നം . എന്തായിരുന്നു അല്ലെ ? നീ ആ ഇഗ്ലീഷിലെ രണ്ടു പെണ്ണുങ്ങളുടെ പിന്നാലെ നടന്നിരുന്നല്ലോ ? എന്താ അവരുടെ പേര് .പേര് മറന്നു !! "

ഞാൻ ശബ്ദം താഴ്ത്തി വിഷയം മാറ്റാൻ ഒരു വൃദാ ശ്രമം നടത്തി .

പക്ഷെ സംസാരം ഇങ്ങനെ പോയികൊണ്ടിരുന്നു . ഇതിനു ഇടയിൽ ഞങ്ങൾക്ക് സീറ്റ് കിട്ടി .ഒരേ സീറ്റിൽ :) !

പട്ടാമ്പി എത്തുന്നതു വരെ ഞാൻ പേടിച്ചു ഇരുന്നു! ! ഇടയ്ക്കു ഇടയ്ക്കു റോഡിന്റെ ശോചനീയ അവസ്ഥയും . പാലം പുതുക്കി പണിയേണ്ട ആവശ്യവും ഒക്കെ പറഞ്ഞു നോക്കി. പക്ഷെ രാജേന്ദ്രൻ വളരെ വേഗം തിരിച്ചു subject il തന്നെ വന്നു നില്ക്കും ! :)

പട്ടാമ്പി ഇറങ്ങി യപ്പോൾ ആണ് ആശ്വാസം ആയതു . പ്രീതിയുടെ നോട്ട് ബുക്കിൽ ഐ ലവ് യു എന്ന് എഴുതിയതും പിന്നെ അവൾ മിണ്ടാതെ ആയതും ഭാഗ്യത്തിന് അവൻ അറിഞ്ഞിട്ടില്ല :) . പഴയ ബസ്‌ സ്റ്റാൻഡിൽ നിന്ന് അവന്റെ KSRTC വരുന്ന വരെ സംസാരിച്ചു .ഒരു ദിവസം വീട്ടിലേക്കു വരാൻ ക്ഷണിച്ച് പിരിഞ്ഞു .